تجديد رخصة السيارة بدون نصب داخل وحدة المرور | اقرأ عن ترخيص العربية بدون دفع مصاريف اضافية

هام جدا عشان ميتنصبش عليك

وانت بتجدد رخصه السيارة في وحدات المرور

نصيحة وانت داخل على اي وحدة مرور ... لو ناوى ترخص عربيتك سواء جديدة او تجديد ترخيص إقرأ البوست ده عشان ماينضحكش عليك عينى عينك من شركات خاصة داخل وحدات المرور

لو عندك فحص:

بعد ما حاتخلص البصمة وتروح تخلص موضوع طفاية الحريق ... ( إللى لازم حايحاول يبيعلك العبوة الكبيرة ال ٢ كيلو لانها أغلى من العبوة الواحد كيلو ... لازم تصر على الكيلو لو عربيتك لغاية ١٥٩٥ سى سى ) وديي أول عملية نصب ... ولو أصر روح للظابط اللى بيمضى الورق وقوله ... حايمضيلك بالأحمر خلف إيصال البطارية وحتاخد بطارية كيلو غصب عنه .

بعد ما تشتري شنطة الاسعافات والمثلث حايبعتك للغرفة اللي جنبه وديي ثانى عملية نصب ... هنا حايقولك إنك لازم تشترى vest لونها اخضر فوسفورى و ٢ شريط عاكس ضوء ب ٧٠ جنيه أوعى تصدقه لأنها (إختيارى)

بعد كده حاتلاقي شباب شيك واقفة قدامه ولابسين فيست شيك وحتلاقى واحد منهم ينادى عليك ويطلب منك الأوراق يبص فيها .... وهنا ثالث عملية نصب : حايقولك روح هنا حضرتك (للكشف على الموتور) وطبعا للأسف الناس بتصدق وياخد منك ١٥٠ جنيه ويديك ايصال ... وخلى بالك ارفض لان ده برضه (إختيارى)

وأول ماتخلص كشف الموتور حاتتعرض على طول لعملية النصب الرابعة وانت لسه سخن ... حايبعتك لزميله شاب شيك برضه واقف جنبه ويقولك حضرتك بعد كده تروح تعمل كشف الاطارات وده حايملالك الاطارات هواء لو محتاجة او حتى لو مش محتاجه ويطلب ٥٠ جنيه ويديك برضو إيصال ... أرفض لان ده برضو (إختياري).

بعد كده يستلمك شاب شيك مختلف ويقولك دلوقت حضرتك اتفضل ده :

كتيب ارشادات وتعليمات وقوانين المرور الجديد لسنة 2020

ب ٢٠ جنيه وبرضه حايديك ايصال ، وديه عملية النصب الخامسة ، أرفض لأنه (إختيارى)

بعد ماتخلص أوراقك وخلاص الموظف/الموظفة بيراجعوا الملف حايقولك روح بس الخزنة ادفع ١٥٠ جنيه للsticker (وده اصلا مجانا )... وهنا عملية النصب السادسة لانها بتبعتك تدفع ال ١٥٠ جنيه دول مقابل اشتراكك في خدمة خدمات الإنقاذ على الطريق عشان ينقل عربيتك بالونش لو احتاجت. أرفض لإن ده برضو (إختيارى)

ولو حاتجمع المبالغ دي كلها حتلاقيها تعدى ال ٥٠٠ جنيه من كل مواطن بيجدد رخصته وبدون وجه حق .

ده طبعا غير مبلغ تجديد الرخصة أصلاً ، والفكرة فى الاحترافية إللى الشباب دول بيتكلموا بيها مع الناس ... هو بيديك الاحساس أنه شغال فى المرور وأنه بيقولك الخطوة إللي بعد كده اللى لازم تعملها ، بينما هم فى الحقيقة تابعين لشركة خدمات خاصة متفقة مع المرور لعرض خدماتها داخل حدود منطقة المرور ... أنما للأسف هم مش بيقولوا أنها خدمات اختيارية ... طول ال ٥ ساعات اللى قضيتهم فى المرور أول امبارح كنت كل ما يبقى عندى فترة انتظار لأوراق كنت بافهم الناس اللى قاعدة منتظرة جنبى وللاسف كلهم اتضحك عليهم ... ناس كتير منهم قدروا يرجعوا الفيست وكتيب المرور بعد ما قلتلهم ... انما معرفوش يرجعوا الباقى للأسف .

بجد حزين لان كل الحاجات دي مكانتش موجودة في المرور لما جددت الرخصة من ٣ سنين ... وكنت فاكر انه حايتحسن مش حايزداد سوء .

اكيد غالبيتنا عنده عربيات ... بلغوا اصحابكم ومعارفكم واعملوا شير لو حبيتوا عشان مايتنصبش عليهم لما يجددوا رخصهم .

( منقول عن السيد اللواء المساعد / كمال مصطفى )

الكلمات المفتاحية: تجديد رخصة السيارة, تجديد رخصة العربية, تجديد الرخصة في المرور, تكاليف تجديد رخصة العربية, تكاليف تجديد الرخصة في المرور